Homenaxe ás vítimas do franquismo ( 31 de outubro, Día da Memoria e Homenaxe a todas as vítimas do golpe militar, a Guerra e a Ditadura). Acto en Ourense o 28 outubro (organiza Comisión Executiva municipal do PSdeG de Ourense)

 

Aprobada en outubro de 2022, a Lei de Memoria Democrática busca promover o coñecemento das etapas democráticas da historia de España e manter a memoria das vítimas da guerra española e da ditadura franquista.

Esta Lei de Memoria Democrática está destinada a toda a sociedade en xeral e, en particular, a todas as vítimas que sufriron danos físicos, morais, psicolóxicos ou patrimoniais, ou viron socavados os seus dereitos fundamentais, como consecuencia das violacións das normas internacionais de dereitos humanos e do dereito internacional humanitario durante o período que abrangue o golpe de estado do 18 de xullo de 1936, a guerra posterior e a ditadura, incluído o período ata a entrada en vigor da Constitución de 1978.
Nesa Lei estableceu varias datas como días oficiais de Memoria: o 31 de outubro, como Día da Memoria e Homenaxe a todas as vítimas do golpe militar, a Guerra e a Ditadura; e o 8 de maio, como Día de lembranza e homenaxe ás vítimas do exilio como consecuencia da Guerra e da Ditadura.

--------------------------------

Imaxe tomada de https://psdegpsoeourense.es/wp-content/uploads/2024/10/cartel_vitimasgcfranquismo.jpeg?w=1024

A Comisión Executiva municipal do PSdeG de Ourense organiza un acto para homenaxear ás vítimas da guerra civil e o franquismo no que se abordará a lei de Memoria Democrática.

https://psdegpsoeourense.es/2024/10/21/organizamos-un-acto-para-homenaxear-as-vitimas-da-guerra-civil-e-o-franquismo-no-que-se-abordara-a-lei-de-memoria-democratica/?fbclid=IwY2xjawGESSBleHRuA2FlbQIxMAABHZ5gfpG0fszyJIvaCqK6B67n37lPw4UCucFnbnm66b0Hn4nkOUJlz5IIKg_aem_q08PPZDacU_tO0e1ZzHtew

 O encontro terá lugar o vindeiro luns, 28 de outubro, ás 19.30 horas no Centro Cultural Marcos Valcárcel e nel se abordará, entre outros aspectos, a Lei de Memoria Democrática
Contará coas intervencións da secretaria xeral, Natalia González; o secretario de Memoria Democrática, Xosé Lois Carrión, así como o subdelegado do Goberno en Ourense, Eladio Santos, e a secretaria xeral de XX.SS. de Ourense, Alba Iglesias.

 Ourense, 21 de outubro de 2024. A Comisión Executiva Municipal do PSdeG-PSOE, da man da secretaria xeral, Natalia González, o secretario de Memoria Democrática, Xosé Lois Carrión, así como o subdelegado do Goberno en Ourense, Eladio Santos, e a secretaria xeral de XX.SS. de Ourense, Alba Iglesias, homenaxeará ás vítimas da guerra civil e o franquismo o vindeiro luns, 28 de outubro, cun acto que terá lugar no Centro Cultural Marcos Valcárcel.
 Trátase dunha homenaxe que non só recorda ás persoas asasinadas, tamén a aqueles que tiveron que exiliarse ou resultaron presas en cárceres e campos de concentración ou traballo, ademais de abordar distintos aspectos da Lei de Memoria Democrática aprobada hai dous anos nas Cortes Xerais. “Esta normativa fundaméntase no firme convencemento de que o coñecemento do noso pasado recente contribúe a asentar a nosa convivencia sobre bases máis firmes, protexéndonos de repetir os seus erros”, destaca Natalia González.
 Pola súa banda, Xosé Lois Carrión engade que a lei “sitúa ás vítimas da guerra e da ditadura franquista no centro da acción pública e das políticas de memoria democrática, que teñen por obxecto dar cumprimento aos principios do dereito internacional dos dereitos humanos de verdade, xustiza, reparación e garantías de non repetición”. 

+++++++++++++++++++++++++++++++++++++++++++++++++++++++++++++++++

O PPdeG vota en contra de ''dignificar'' ás vítimas de Franco

13/10/2010 - http://lv.galiciae.com/nova/64726.html

Memoria histórica

O PPdeG vota en contra de ''dignificar'' ás vítimas de Franco

A maioría absoluta do PPdeG na Cámara galega rexeitou este mércores unha proposición de lei presentada polo PSdeG e apoiada polo BNG para a localización e identificación das persoas desaparecidas durante a Guerra Civil e a ditadura, e a dignificación das fosas comúns. Os socialistas reclamaban un censo de desaparecidos, un mapa de enterramentos e a identificación das vítimas.

A portavoz de Cultura do PSdeG, Concepción Burgo, durante a súa intervención agradeceu en primeiro lugar a presenza no Hemiciclo da Cámara Autonómica de diversas organizacións relacionadas coa recuperación da memoria histórica da nosa Comunidade. A deputada socialista dixo que para o PSdeG esta iniciativa ''supón un acto de xustiza ante unha vergoña histórica'' como son todos os mortos da represión e a ditadura. Sinalou tamén que ''é froito do compromiso moral e legal coas familias dos desaparecidos para honrar a súa memoria''. E resumiu esta proposta en dúas palabras: ''recordar e dignificar''.

Burgo recordou que esta iniciativa socialista desenvolve unha serie de artigos da Lei de Memoria Histórica, e tamén unha Resolución aprobada por unanimidade polo Parlamento de Galicia (8-10-2008), onde se instaba á Xunta a proseguir coas accións dirixidas a recuperar e dignificar a memoria das vítimas  da represión durante a Guerra Civil, eliminar os símbolos, e colaborar na identificación dos desaparecidos e enterrados en fosas comúns. A portavoz de Cultura emprazou aos poderes públicos a devolver os restos ás familias ''para que teñan a honra que se merecen''. 

Burgo remarcou que ''non queremos abrir feridas senón garantir dereitos''. E insistiu na súa exposición en que ''esta iniciativa ten un sentido tan ético que tería que superar calquera discrepancia política''. Así recordou que en Galicia hai ao redor de cen fosas cunhas catrocentas vítimas. Neste punto denuncia que o Goberno de Feijoo ''negouse a participar na construción do mapa de enterramentos de fosas realizados polo Ministerio de Xustiza''.

Xa na quenda de replicar a deputada socialista dixo que a actitude do PP sobre este asunto ''é lamentable''. Asegurou que toda a dereita europea condenou a ditadura e o franquismo. ''Nós non consideramos ao Partido Popular os herdeiros do franquismo, son vostedes, os que con actitudes como as que mostraron hoxe na Cámara, os que se converten nos seus herdeiros e defensores'', sentenciou.  Para rematar enviou unha mensaxe ao Partido Popular na que dixo que ''tanta misa do Peregrino e procesión de fe, e esquécense da xustiza. A única división de España créana vostedes'', concluíu Concepción Burgo.

Apoio do BNG

A deputada  do BNG, Ana Pontón mostrou o apoio do seu grupo á iniciativa socilaista, asegurando que ''no BNG somos conscientes do valor simbólico e emotivo das fosas e desaparecidos por ser a mostra máis palpable da barbarie do ano 36''. Pontón reclamou a reactivación, ''por parte do Goberno galego'' dun verdadeiro proceso para a recuperación da memoria histórica  porque colectivamente -dixo- ''temos  dereito á verdade''.

A nacionalista recordou que en Galicia non houbo guerra pero si unha represión ''violenta e brutal'' con 12.000 persoas represaliadas, 4.500 desaparecidas, 3.000 paseadas e 1.322 fusiladas logo de xuízos sumarísimos e pediu que o Partido Popular ''non nos siga tomando o pelo'' cando afirma que apoian a recuperación da memoria histórica e logo  paralizan a localización das fosas e reducen o  convenio coa universidade para estes labores.

Pontón considerou que ''seguen existindo poderes'' no Estado español que  rexeitan  levar a cabo unha investigación sobre os crimes do franquismo e aos seus autores e dixo  que ''os límites que o propio estado impón para este tipo de procesos tivo a súa maior expresión no proceso contra o xuíz Baltasar Garzón''.

A parlamentaria do BNG pediu que o Partido Popular, que condenou no ano 2008 o réxime franquista, demostre que esa condena  non era ''unha posta en escena'' e dea un paso adiante na recuperación da memoria histórica para que moitos familiares das vítimas da represión poidan recuperar os cadáveres e documentación dos procesos e sumarios.

O PP di que ''Franco é pasado''

Pola súa banda, o deputado do PPdeG Agustín Baamonde acusou ao PSdeG e ao BNG de non querer expor o tema da memoria histórica sobre o franquismo con ''espírito de conciliación e concordia''.

No transcurso do acalorado debate da proposición, no que Baamonde e o deputado do BNG Bieito Lobeira cruzáronse acusacións, o parlamentario do PPdeG criticou que a oposición trate de que o Goberno galego actúe de oficio para investigar o pasado en relación coa memoria histórica, o que, dixo, ''significa colocar outra vez a uns contra outros''.

Baamonde cualificou de ''innecesaria, inútil e contraditoria'' a proposición de lei dos socialistas, e aos deputados do BNG acusounos de pretender ''reescribir a historia dun xeito tendencioso''. ''Non se pode facer unha memoria parcial, selectiva e interesada", dixo o deputado do PPdeG, quen engadiu que ese período non pode ser analizado "sobre o principio maniqueo'' dos bos e os malos.

Baamonde asegurou que ''Franco é pasado'' e dixo que de seguir nesa liña, a oposición será coñecida ''como os Atapuerca da política española''.

Xaime Quessada, "Los sótanos de Gobernación",1968 

Colmeiro, 1936, "Muller con fusilado"